د افغانستان د کرکټ بورډ اعلان کړی چې د افغانستان د کرکټ ملي لوبډله به راتلونکې میاشت په یوه ۲۰ اوریزه دوستانه سیالۍ کې د ازبکستان له ملي لوبډلې سره مخامخ سي.
د کرکټ بورډ د اعلان پر بنسټ، دا لوبه به د خوست ښار په رحمتولي مسروري کرکټ لوبغالي کې ، د «ایاند شپږګیزه ۲۰۲۶» لیګ د یولسم پړاو له ترسره کېدو سره به هممهاله ترسره سي.
دا سیالي به د کابل په وخت د سهار په ۹ بجو پیل سي.
دا سیالي د افغانستان د کرکټ بورډ او د ازبکستان د کرکټ فدراسیون ترمنځ د همکارۍ د هوکړه لیک په چوکاټ کې ترسره کېږي؛ هغه هوکړه لیک چې د ۲۰۲۵ کال په ډسمبر کې د ازبکستان د کرکټ د پراختیا د ملاتړ په موخه لاسلیک سوی وو.
افغانستان په تېرو لسو کلونو کې په سیمه کې د کرکټ یو مخ پر وده ځواک ګرځېدلی، په داسې حال کې چې ازبکستان د ګاونډیو هېوادونو او نړیوالو بنسټونو په ملاتړ هڅه کوي د دې سپورتي څانګې بنسټیز جوړښت او د پراختیايي پروګرامونو ساحه پراخه کړي.
دا سیالي په داسې شرایطو کې ترسره کېږي چې په افغانستان کې ښځې او انجونې لا هم له ، د کرکټ په ګډون ، د ټولو ورزشي څانګو څخه محرومې دي.
