د معمار خبري اژانس د راپور له مخي ؛ هندي رسنیو راپور ورکړی چې د افغانستان د کرکټ بورډ هیئت (ACB) ښايي د لومړي ځل لپاره ، په درې لوبیزو T20I سیالیو کې ، د هند د کرکټ ملي لوبډلې کوربه توب وکړي.
د دغو راپورونو له مخې، دا سیالۍ د سپتمبر میاشتې لپاره پلان سوې دي او ټاکل سوې ده چې په نوي ډیلي ښار کې ترسره سي. خو تر اوسه پورې نه د افغانستان د کرکټ بورډ هیئت او نه هم د هند لوري په رسمي ډول دا پروګرام تأیید کړی دی.
که دا سیالۍ ترسره سي، نو دا به لومړی ځل وي چې افغانستان د هند پر وړاندې د یوې درې سیالیو لرونکې شل اوریزې نړیوالې لړۍ د کوربه په توګه پېژندل کېږي.
له دې مخکې یوازې یو ځل د دواړو ټیمونو ترمنځ د T20I لړۍ ترسره سوې وه چې کوربه توب یې هند کړی وو. په وروستیو کلونو کې د دواړو هېوادونو ترمنځ ورزشي اړیکې پراخې سوې دي او د افغانستان ملي لوبډلې څو ځله له هندي اسانتیاوو او لوبغالو څخه د نړیوالو سیالیو د کوربه توب لپاره ګټه اخیستې ده.
همدارنګه راپورونه ښايي چې د افغانستان د کرکټ ملي لوبډله د هند پر وړاندې د خپل یوازیني ټېسټ سیالۍ لپاره چمتووالی نیسي؛ هغه لوبه چې ټاکل سوې د جون په شپږمه نېټه پیل سي.
ورزشي کارپوهان باور لري چې د دغو سیالیو ترسره کېدل کولای سي د افغانستان د کرکټ نړیوال دریځ د پراختیا او د کابل او نوي ډیلي ترمنځ د ورزشي اړیکو د پیاوړتیا لپاره یو مهم ګام وي.
