د معمار خبري اژانس د راپور له مخې؛ ورزشي سرچینې ویلي چې زموږ د هېواد د فوټسال ملي لوبډله د آسیا په وروستۍ درجهبندي کې څلورم مقام ته رسیدلی؛ دغه مقام که رسمي تأیید سي، د افغانستان د فوټسال تر ټولو غوره تاریخیزه موقعیت به وي.
ورزشي خبري سرچینې وایي، که څه هم د نړۍ او آسیا د ملي فوټسال لوبډلو رسمي درجهبندي لا نهده خپره سوې، خو باوري غیر رسمي راپورونه ښايي چې د افغانستان د فوټسال ملي لوبډله د آسیا په څلورو غوره لوبډلو کې ځای موندلی دی .
د راپورونو له مخې، د افغانستان د فوټسال ملي لوبډله د ایران، جاپان او اندونیزیا وروسته په آسیا کې څلورم مقام لري.
دا پرمختګ په داسې حال کې رامنځته سوی چې د افغانستان د فوټسال ملي لوبډلې د آسیایی ملتونو په سیالیو کې د ګروپي پړاو په جریان کې غوره او د پام وړ فعالیتونه ترسره کړل، او سره له دې چې له خپل ګروپ څخه یې پورته سوه، په یو-څلورم پایلوبه کې د جاپان پر وړاندې له سیالیو وایستل سوه.
د لوبډلي وروستي رسمي او دوستانه لوبې هم د دې سبب ګرځېدلي چې د افغانستان د احتمالي مقام په لوړیدو کې اغېز ولري.
افغانستان په پخوانۍ درجهبندي کې په آسیا کې اووم مقام او په نړۍ کې ۲۸م ځای درلود. د څلورم مقام ترلاسه کول—که رسمي سي—د افغانستان د فوټسال تر ټولو غوره تاریخیزه مقام به وي.
د باخبره سرچینو له وینا سره سم، تمه کیږي چې رسمي درجهبندي به د افریقا د ملتونو سیالیو د پای ته رسیدو وروسته خپره سي. تر هغه وخته پورې، دا معلومات یوازې د غیررسمي راپورونو په توګه پاتې دي او باید د فوټسال نړیوالو ادارو د وروستي اعلان انتظار وسي.
