د افغانستان د فوټبال فدراسیون د پاکستان پر وړاندې رسمي شکایت د آسیا فوټبال کنفدراسیون (AFC) ته سپارلی

د معمار خبري آژانس د راپور له مخې، د افغانستان د فوټبال فدراسیون ویلي چې د لوبغاړو د ویزو د ناوخته صادرېدو موضوع یې په رسمي ډول د آسیا فوټبال کنفدراسیون ته وړاندې کړې ده. فدراسیون زیاته کړې چې د پاکستان له‌خوا د ویزو د صادرېدو په ځنډ کېدو سره، دا موضوع په رسمي ډول د AFC سره ثبت سوې ده. د افغانستان او پاکستان ملي لوبډلې ټاکل سوې چې د پنجشنبې په ورځ، د میزان په ۱۷مه، د آسیا د ملتونو د جام د مقدماتي سیالیو په لړ کې، د اسلام‌‎آباد ښار په جناح لوبغالي کې د یو بل پر وړاندې لوبه وکړي. فدراسیون ټینګار کړی چې د ملي لوبډلې د غړو لومړنی لست یې د سپتمبر په ۱۸مه د پاکستان سفارت ته استولی وو، خو د پرله‌پسې اړیکو او رسمي تعقیبونو سره سره، تر اوسه د لوبغاړو او د ټیم د نورو غړو ویزې نه دي صادر سوې. دغه فدراسیون یادونه کړې چې د افغانستان د ملي لوبډلې لوبغاړي باید له اروپایي هېوادونو، استرالیا، امریکا، کاناډا او نورو آسیایي هېوادونو څخه پاکستان ته سفر وکړي، او د ویزو په صادرېدو کې ځنډ د ټیم د پلان سوې برنامې ګډوډۍ سبب سوی دی. په اعلامیه کې راغلي چې دا ځنډ به ددې لامل سي چې لوبغاړي پرته له تمریني غونډو او لازمې چمتووالي د کوربه ټیم پر وړاندې ولوبېږي، چې دا کار به د ټیم پر فعالیت منفي اغېز ولري. د افغانستان د فوټبال فدراسیون له آسیا فوټبال کنفدراسیون څخه غوښتي چې په دې برخه کې مداخله وکړي او ستونزه حل کړي، څو په سیالیو کې عدالت وساتل سي.