د افغانستان د معیوبینو ملي کرکټ ټیم پاکستان ته ولاړ

د معمار خبري آژانس د راپور له مخې، د افغانستان کرکټ بورډ اعلان کړی چې د هېواد د ویلچېر ملي کرکټ ټیم د یو لړ دوستانه سیالیو د ترسره کولو په موخه پاکستان ته تللی دی. د خپرو سویو معلوماتو پر بنسټ، ټاکل سوې ده چې د دې سفر پر مهال د افغانستان او پاکستان د ټیمونو تر منځ څلور دوستانه شل اوریزه سیالۍ ترسره سي. یادې سیالۍ د ۱۴۰۴ لمریز کال د میزان له ۷مې څخه تر ۱۰مې نېټې پورې د پاکستان په خاوره کې ترسره کېږي. د افغانستان کرکټ بورډ ددې سفر موخه د دواړو هېوادونو تر منځ د ورزشي اړیکو پراختیا او د معیوبو ورزشکارانو لپاره د لا ډېرو فرصتونو برابرول بللي دي. د دې ترڅنګ، په سیمه ییزه کچه د ځانګړو ورزشونو د پاملرنې له زیاتوالي سره، دغه سیالۍ کولای سي د ویلچېر کرکټ د ودې او پیاوړتیا په لور مهم ګام وي.