د معمار خبري آژانس د راپور له مخي؛ اشرف غني، د افغانستان پخواني ولسمشر ، د پاکستان د وروستیو هوايي بریدونو په غبرګون کې ، چې د پکتیکا، پکتیا او کونړ ولایتونو پر سیمو ترسره سوي، ویلي چې دغه پېښې د بحران نوي پړاو ته د افغانستان د داخلېدو نښه ده . نوموړي ویلي چې دغه بریدونه د هېواد لپاره جدي انساني او سیاسي پایلې لري.
ښاغلي غني ویلي چې د ملکي وګړو، په ځانګړي ډول د ښځو او ماشومانو وژل کېدل او ټپي کېدل د روان بحران ژوروالی او د افغانستان د امنیتي وضعیت کمزورتیا څرګندوي.
پخواني ولسمشر په خپل پیغام کې دغه بریدونه یوازې امنیتي پېښه نه ده بللې، بلکې هغه یې د یوې لا پېچلې سیاسي او امنیتي وضعیت برخه ګڼلې او ویلي یې دي چې افغانستان داسې پړاو ته روان دی چې پکښې بېثباتي او بهرني فشارونه هممهاله زیاتېږي.
هغه د هېواد عمومي وضعیت ته په اشاره ویلي چې افغانستان په وروستیو کلونو کې له سیمهییز او نړیوال تعامل څخه لیرې سوی او د انزوا په لور روان سوی دی.
هغه زیاته کړې چې دغه وضعیت د تاوتریخوالي پېښو پر وړاندې د نړۍ د اغېزمنې پاملرنې او غبرګون کموالی رامنځته کړی دی.
ښاغلي غني همدارنګه د هېواد د اوسني وضعیت په اړه پوښتنې مطرح کړي او ویلي یې دي چې وګړي حق لري چې پوه سي ولې د امنیت ژمنې عملي نه سوې، ولې هېواد د پرلهپسې بحرانونو په کړۍ کې راګیر سوی او ولې د افغانستان پر ملي حاکمیت د سرغړونو په وړاندې قوي او اغېزمن نړیوال غبرګون نه څرګندېږي.
هغه ویلي چې د اوسني وضعیت دوام کولای سي د سیاسي ثبات، ملي امنیت او اقتصادي راتلونکي لپاره جدي پایلې ولري او زیاتوي چې د وګړو او حاکم جوړښتونو ترمنځ واټن هېواد لا ډېر زیانمن کړی دی.
د افغانستان پخواني ولسمشر همدارنګه د یوې پراخې ملي هوکړې د پیل پر اړتیا ټینګار کړی او ویلي یې دي چې د افغانستان راتلونکی باید د ملي اجماع، د ټولو سیاسي جریانونو د ګډون او د ملي ګټو د ګډ تعریف پر بنسټ جوړ سي.
هغه د خپل پیغام په پای کې ویلي چې د روانو بحرانونو تل پاتې حل یوازې د ملي هوکړې ، د تاوتریخوالي د کمولو او د هېواد د لویو سیاستونو د بیاکتنې له لارې ممکن دی او خبرداری یې ورکړی چې د اوسني وضعیت دوام به د افغان ولس لپاره درنې پایلې ولري.
پاکستان تېر ماښام یو ځل بیا د افغانستان سرحدي سیمې د هوايي بریدونو هدف وګرځولې.
په دغو بریدونو کې د پکتیکا د ګیان ولسوالۍ، د پکتیا څمکني او د کونړ منوره بمبار سوي دي.
په افغانستان کې د ملګرو ملتونو د مرستندویه چارو دفتر (یوناما) تایید کړې چې په دې بریدونو کې لږ تر لږه ۲۸ ملکي وګړي وژل سوي او ۴۹ نور ټپیان سوي دي.
