طالبانو اعلان کړی چې د ننګرهار ولایت په شیرزادو ولسوالۍ کې یې د اووه میلیونه افغانیو څخه په زیات لګښت د اوبو رسولو یوه شبکه جوړه کړې او ګټې اخیستنې ته یې سپارلې ده.
د طالبانو اړوند باختر خبري آژانس د جوزا په درېیمه، د یکشنبی په ورځ راپور ورکړی چې دا پروژه په ننګرهار کې د طالبانو د کلیو د بیارغونې او پراختیا ریاست له لوري پلې سوې او ۷.۳ میلیونه افغانۍ لګښت پرې راغلی دی.
د طالبانو د ادعا له مخې، د دغې اوبو رسولو شبکې په بشپړېدو سره د سیمې شاوخوا ۶۰۰ کورنیو ته د څښاک پاکې اوبه برابرې سوې دي.
دا په داسې حال کې ده چې د ملګرو ملتونو د ماشومانو د ملاتړ صندوق (یونیسف) مخکې اعلان کړی وو چې د څښاک پاکو اوبو ته لاسرسی لا هم په افغانستان کې د زیانمنو کورنیو له اساسي اړتیاوو څخه شمېرل کېږي.
د افغانستان په ډېرو لیرې پرتو سیمو کې کورنۍ لا هم پاکو اوبو ته لاسرسی نه لري او د څښاک اوبو د برابرولو لپاره اړ دي اوږدې لارې په پښو ووهي.
