د معمار خبري آژانس د راپور له مخې؛ د افغانستان د مقاومت ملي جبهې اعلان کړی چې د هرات ولایت په ګذره ولسوالۍ کې یې یو هدفمند عملیات ترسره کړي چې په پایله کې دوه طالب غړي وژل سوي دي.
د دې جبهې د خپرې سوې اعلامیې له مخې، دا عملیات د هرات–کندهار د کمربند په درېلارې سیمه کې د ګذره ولسوالۍ اړوند ترسره سوي دي.
دې جبهې ادعا کړې چې د دې عملیاتو په ترڅ کې دوه طالب غړي وژل سوي او دوه وسلې هم د دوی د ځواکونو لاس ته ورغلي دي.
د مقاومت ملي جبهې د وژل سویو کسانو د هویت او د ترلاسه سویو وسلو د ډول په اړه نور جزئیات نه دي وړاندې کړي.
تر دې دمه طالب چارواکو د دې ادعا په اړه کوم غبرګون نه دی ښودلی او خپلواکو سرچینو هم د دې پېښې جزئیات نه دي تایید کړي.
په وروستیو میاشتو کې د مقاومت ملي جبهې څو ځله د هېواد په بېلابېلو ولایتونو کې د طالبانو پر ضد د عملیاتو خبر ورکړی، خو دا ادعاوې په ډېرو مواردو کې د خپلواکو سرچینو له خوا نه دي تایید سوې.
