د معمار خبري آژانس د راپور له مخې ؛ عبدالمتین قانع د طالبانو د کورنیو چارو د وزارت ویاند اعلان کړی چې سراجالدین حقاني ، د کورنیو چارو د وزارت وزیر ، د ایران له سفیر علیرضا بیکدلي سره په کابل کې لیدلي او خبرې یې کړې دي.
د طالبانو د کورنیو چارو د وزارت د ویاند په وینا، په دې لیدنه کې دواړو لورو د دواړو ګاونډیو هېوادونو د یو شمېر ګډو مسایلو په اړه خبرې او نظرونه تبادله کړي دي.
په کابل کې د ایران د اسلامي جمهوریت سفارت هم د سهشنبې په ورځ (د ثور په ۸مه) اعلان کړی چې په دې ناسته کې دواړو لورو د سیمې د وروستیو تحولاتو په اړه نظرونه تبادله کړي دي. همدارنګه د خبرو یوه برخه د ایران او افغانستان د دوه اړخیزو اړیکو ارزونې ته ځانګړې سوې وه.
خو سره له دې، د دې لیدنې د منځپانګې په اړه نور جزئیات نه دي خپاره سوي.
د ویلو وړ ده چې سراجالدین حقاني تېره ورځ هم په کابل کې د چین له سفیر سره لیدنه کړې وه.
