د طالبانو د بهرنیو چارو وزارت اعلان کړی چې د دې وزارت وزیر امیرخان متقي، د سعودي عربستان د بهرنیو چارو له وزیر فیصل بن فرحان سره د ټیلیفوني اړیکې له لارې د دوه اړخیزو اړیکو د پراختیا او د سیمې د مسایلو په اړه خبرې کړې دي.
د طالبانو د بهرنیو چارو وزارت په خبرپاڼه کې ویل سوي چې متقي په دې ټیلیفوني اړیکه کې د سیمې د ثبات د ټینګښت په برخه کې د سعودي عربستان له هڅو مننه کړې ده.
دغه وزارت د یکشنبې په ماښام (د ثور په شپږمه) اعلان کړی چې نوموړي همدارنګه په سعودي عربستان کې د مېشتو افغانانو د معلوماتو د لېږد په برخه کې د دغه هېواد له همکارۍ هم مننه کړې ده.
په دې خبرو کې دواړو لورو د سعودي عربستان په خاوره کې د افغانستان د سیاسي استازولیو د بشري سرچینو د ظرفیت د پیاوړتیا پر ارزښت هم ټینګار کړی دی.
د خبرپاڼې له مخې، فیصل بن فرحان د سیمې ثبات د ټولو هېوادونو لپاره اړین بللی او د تاوتریخوالي د کمولو لپاره یې د خبرو او ډیپلوماسۍ پر دوام ټینګار کړی دی.
دا ټیلیفوني اړیکه په داسې حال کې سوې چې له طالبانو او پاکستان ترمنځ د کړکېچونو وروسته، سعودي عربستان د قطر او ترکیې ترڅنګ هڅه کړې چې د دواړو لورو ترمنځ د خبرو زمینه برابره کړي، خو دا هڅې تر اوسه د طالبانو او پاکستان ترمنځ د کومې مشخصې هوکړې لامل سوې نه دي.
