د معمار خبري آژانس د راپور له مخې، د طالبانو د ارشاد، حج او اوقافو وزارت اعلان کړی چې د حج د مناسکو تر ادا کولو وروسته له سعودي عربستان څخه د افغان حاجیانو د بېرته ستنېدو بهیر پیل سوی دی.
د دې وزارت د څرګندونو له مخې، شاوخوا ۳۰ زره افغان حاجیان به په دوو پړاوونو کې او د کابل، بلخ، کندهار او هرات د هوايي ډګرونو له لارې هېواد ته راستانه سي.
د طالبانو د ارشاد، حج او اوقافو وزارت د معلوماتو له مخې، د حاجیانو د بېرته ستنېدو لومړۍ الوتکه له جدې ښار څخه کابل ته ترسره سوې چې په ترڅ کې یې د ننګرهار ولایت ۳۴۶ حاجیان د حج له اوو ښوونکو سره یوځای افغانستان ته راستانه سوي دي.
دې وزارت همدارنګه ویلي چې د حاجیانو د بېرته ستنېدو بهیر به د ۹۷ الوتنو په لړ کې او د راتلونکو ۳۰ ورځو په موده کې بشپړ سي.
د طالبانو د حج او اوقافو مسوولانو ټینګار کړی چې د حاجیانو د منظم لېږد لپاره دقیق پلان جوړ سوی او هڅه کېږي چې ټول زیارت کوونکي له کومې ستونزې پرته خپلو اړوندو ولایتونو ته ولېږدول سي.
