پاکستاني امنیتي سرچینو اعلان کړی چې د دغه هېواد سرحدي ساتونکو، د طالبانو د ځواکونو له لوري پر سرحدي پوستو د برید په غبرګون کې، د دې ډلې مورچلونه په توپچي بریدونو په نښه کړې دي.
د ډان ورځپاڼې د یکشنبې په ورځ، د سرطان په ۲۸مه، راپور ورکړی چې طالب جنګیالیو د سپکو او درنو وسلو په کارولو سره د پاکستان پر څو سرحدي پوستو برید کړی دی.
د دې راپور له مخې، پاکستاني امنیتي ځواکونو د دغو بریدونو په ځواب کې، د پولې هغې غاړې ته د طالبانو مورچلونه تر توپچي ډزو لاندې راوستې دي.
پاکستاني امنیتي چارواکو هم ادعا کړې ده چې د دغو بریدونو په پایله کې، طالب جنګیالیو خپل مورچلونه پرېښې او شاتګ یې کړی دی.
د طالبانو او پاکستاني سرحدي ساتونکو ترمنځ نښتې، افغانستان ته د طالبانو د بیا واکمنېدو له وخته څو ځله رامنځته سوي دي او د دواړو هېوادونو د پولې په اوږدو کې کړکېچونه لا هم دوام لري.
