د افغانستان شنه بهیر اعلان کړی چې مولوي محمد منیب، په کندز ولایت کې د طالبانو د استخباراتو د ریاست د داخلي کشف مدیر، د یوې وسلهوالې حملې په پایله کې، په کندز ښار کې ټپي سوی دی.
د دې جریان په وینا، برید د چهارشنبې ماښام، د ۱۴۰۵ کال د سرطان په درېیمه نېټه، د کندز ښار په درېیمه ناحیه کې رامنځته سوی دی. د دې ادعا له مخې، مولوي محمد منیب له دې برید څخه ژوندی پاتې سوی، خو ټپي سوی او د پنجشنبې په سهار، د سرطان په څلورمه نېټه، د درملنې لپاره کابل ته انتقال سوی دی. تر اوسه د هغه د روغتیايي وضعیت په اړه معلومات نه دي خپاره سوي.
شنه بهیر په خپل بیان کې زیاته کړې چې مولوي محمد منیب، د مولوي عطاالله زوی او د بغلان ولایت اصلي اوسېدونکی دی، مخکې یې په بامیان ولایت کې د طالبانو د استخباراتو د ریاست د داخلي کشف د مدیر په توګه دنده ترسره کوله او شاوخوا درې میاشتې وړاندې کندز ولایت ته لېږدول سوی وو.
طالبانو تر اوسه د دې ادعا او د راپور سوې حملې په اړه رسمي غبرګون نه دی څرګند کړی.
دا پېښه په داسې حال کې راپور کېږي چې د تېرې ورځې په ماښام هم په کندز ښار کې د طالبانو د امر بالمعروف او نهی عن المنکر ریاست ته نږدې یوه چاودنه سوې وه.
