د احمد مقصود د کورنۍ غړي، چې د تخار ولایت اوسېدونکی وو، وایي سیفالله نومي کس، چې د بغلان ولایت اوسېدونکی دی، د تېر کال د جوزا په ۲۱مه نېټه د بغلان مرکزي ولسوالۍ په اړوند سیمه کې د دوی د کورنۍ دغه غړی وژلی او وروسته له سیمې تښتېدلی وو.
د مقتول د کورنۍ په وینا، تورن کس له ۱۱ میاشتو تېښتې وروسته د طالبانو له خوا نیول سوی و، خو له لنډې مودې وروسته بېرته ازاد سوی دی.
دغه کورنۍ ادعا کوي چې د احمد مقصود د وژنې تورن سیفالله د بغلان مرکزي ولسوالۍ د ابتدائیه محکمې د رئیس ضیاءالرحمن فاروقي له خوا ازاد سوی او اوس د وژنې له تور سره سره په ازاد ډول ګرځي راګرځي. هغوی د طالبانو ځینې سیمه ییز چارواکي، په ځانګړي ډول ښاغلی فاروقي، په دې بهیر کې ښکېل بولي.
د خپلوانو د څرګندونو له مخې، دغه پېښه د لوی اختر په څلورمه ورځ رامنځته سوې وه او احمد مقصود په تاوتریخوالي سره وژل سوی وو.
د مقتول خپلوانو په بغلان کې له طالب چارواکو غوښتي چې تورن کس بېرته ونیول سي او دوسیه یې د شرعي او عدلي اصولو له مخې وڅېړل سي.
