د سیمهییزو چارواکو د اعلان له مخې، د وروستیو ناارامیو په ترڅ کې ۱۱ ملکي وګړو او ۴ امنیتي ځواکونو خپل ژوند له لاسه ورکړی دی. همدارنګه په دغو نښتو کې یو شمېر نور کسان هم ټپیان سوي دي.
راپورونه ښايي چې دغه اعتراضونه د کشمیري کډوالو لپاره په سیمهییزه قانون جوړونکې شورا کې د ۱۲ ځانګړو څوکیو د ځانګړي کېدو په غبرګون کې رامنځته سوي دي؛ هغه کسان چې دا مهال د کشمیر په هغو سیمو کې نه اوسیږي چې د پاکستان تر کنټرول لاندې دي.
سیمهییزو چارواکو ویلي چې په تېرو څو ورځو کې شاوخوا ۱۰ زره کسان د کشمیر په بېلابېلو ښارونو او سیمو کې سړکونو ته راوتلي او د دغو ځانګړو څوکیو د لغوه کېدو غوښتنه یې کړې ده.
اعتراض کوونکي باور لري چې د دغو څوکیو برخلیک باید د کشمیر د اوسېدونکو د مستقیمو رایو او د ټاکنو د ترسره کېدو له لارې وټاکل سي. د هغوی په اند، هغو کسانو ته د پارلماني څوکیو ځانګړي کول چې په سیمه کې ژوند نه کوي، د کشمیر د اوسېدونکو د سیاسي استازیتوب اصل کمزوری کوي او د ټاکنو پر ډیموکراتیک بهیر منفي اغېز کوي.
کړکېچونه لا هم د کشمیر په بېلابېلو سیمو کې دوام لري او د تاوتریخوالي د زیاتېدو او د ناارامیو د پراخېدو په اړه اندېښنې مخ په زیاتېدو دي.
