د معمار خبري اژانس د راپور له مخې؛ محمد اسماعیلخان ، د افغانستان یو پخوانی جهادي قوماندان ، په هرات کې د ښځو د ځورونې او د طالبانو له لوري د ښځو د پراخو نیونو د وروستیو راپورونو په غبرګون کې په یوه اعلامیه کې ویلي چې دا کړنې «د بخښلو او زغملو وړ نه دي».
هغه طالبانو ته په خطاب کې خبرداری ورکړی: «تاریخ شاهد دی چې هېڅ حکومت د زور، ځپنې او د وګړو د سپکاوي له لارې تر منزل نه دی رسېدلی او نه به ورسېږي.»
اسماعیلخان د هرات له ښځو او نارینهوو څخه غوښتي چې د فشارونو پر وړاندې مقاومت وکړي او ټینګار یې کړی چې دا وضعیت به دوام ونه کړي.
دې پخواني جهادي قوماندان په خپل پیغام کې لیکلي چې هغه «وحشي، ناپوهه او بې تجربې کړنې» چې د وګړو له «حیثیت، عزت او انساني او اسلامي کرامت» سره لوبې کوي، د توجیه وړ نه دي.
هغه همدارنګه ویلي چې پر ښځو او انجونو «سلیقوي» محدودیتونه د دې ولایت د وګړو له «درناوي او حیثیت» سره بېاحترامي ده او ټینګار یې کړی چې د دیني احکامو تبلیغ په «غیر اصولي او سلیقوي طریقو» سره له «دین څخه د وګړو د لیرې کېدو او د باورونو د کمزورۍ» پرته بله نتیجه نه لري.
اسماعیلخان د وګړو د « زورواکي، بېقانونۍ، د مشروع او حساب ورکونکي حکومت نشتوالي او فقر» له امله پر رنځونو اشاره کړې او ویلي یې دي چې د ښځو ځورونه په حقیقت کې د دې ښار د وګړو سپکاوی دی.
هغه په پای کې ټینګار کړی: «زموږ د خلکو عزت زموږ سره کرښه ده او د ښځو پر وړاندې د ظلم په وړاندې چوپتیا د افغانستان له هویت سره خیانت دی.»
هغه همدارنګه د هرات انجونو ته په خطاب کې ویلي: «ستاسو غږ د وېښ وجدان غږ دی.»
