نیومن د شنبې په ورځ، د جوزا په ۱۶مه، په خپل اېکس پاڼه کې لیکلي چې دا اقدام نه یوازې د هغو افغان وګړو لپاره چې لا هم د خپلو بنسټیزو حقونو او آزادیو لپاره مبارزه کوي، بلکې د هغو زورواکو حکومتونو لپاره هم چې د اروپا کړنې له نږدې څاري، ناسم پیغام لري.
د اروپا د پارلمان د دې غړې څرګندونې وروسته له هغه مطرح سوې چې د طالبانو د استازو بروکسل کې د اروپايي ټولنې مرکزي دفتر ته د بلنې په اړه راپورونه خپاره سوي وو؛ هغه موضوع چې د بشري حقونو د فعالانو او د افغانستان د یو شمېر وګړو پراخ غبرګونونه یې راپارولي دي.
په داسې حال کې چې په افغانستان کې د انجونو له زدهکړې محرومیت لا هم دوام لري، د بشري حقونو ګڼ شمېر بنسټونه دغه وضعیت په هېواد کې د بشري حقونو له تر ټولو جدي بحرانونو څخه ګڼي.
په همدې حال کې، د افغانستان یو شمېر وګړي باور لري چې له طالبانو سره هر ډول رسمي تعامل کولای سي د دې ډلې محدودیتي او ځپونکې پالیسي، په ځانګړي ډول د ښځو او انجونو پر وړاندې، عادي کړي.
د دې موضوع په غبرګون کې، په اسپانیا کې مېشت د افغانستان یو شمېر وګړو په مادرید کې هم اعتراضي غونډه ترسره کړه. معترضانو په دې غونډه کې له اروپايي بنسټونو سره د طالبانو د هر ډول بلنې یا رسمي تعامل مخالفت څرګند کړ او له نړیوالې ټولنې یې وغوښتل چې په افغانستان کې د بشري حقونو وضعیت ته لا ډېر پام وکړي.
