د معمار خبري اژانس د راپور له مخي ؛ امرالله صالح، د افغانستان د پخواني ولسمشر لومړی مرستیال او د زرغون بهير مشر، د قربانۍ د اختر په مناسبت په یو غږیز پیغام کې د افغانستان د اوسني وضعیت په اړه نیوکه کړې او ویلي یې دي چې طالبانو هېواد له پنځو «ستر ناورینونو او بحرانونو» سره مخ کړی دی.
صالح په ځانګړي ډول د مشروعیت بحران، ملي جلاوالی ، نړیواله انزوا، اقتصادي خرابوالی او د زدهکړې وضعیت د افغانستان له مهمو ستونزو څخه یاد کړي دي.
هغه په خپل پیغام کې ټينګار کړی چې زرګونه افغانان د طالبانو په زندانونو کې ساتل کېږي او له خپلو اساسي حقونو څخه محروم دي.
د افغانستان د پخواني ولسمشر لومړی مرستیال زیاته کړې چې تر څو د طالبانو واکمني دوام ولري، له نړۍ سره د افغانستان د عادي اړیکو ټینګول ممکن نه دي.
امرالله صالح پر طالبانو له نیوکه کوونکو څېرو څخه شمېرل کېږي او د پخواني حکومت له سقوط وروسته یې څو ځله د افغانستان د سیاسي، بشري حقونو او اقتصادي وضعیت په اړه اندېښنه څرګنده کړې ده.
