په افغانستان کي د ناموسي وژنو د زياتېدو او د طالبانو د دوامداره چوپتيا سره هممهاله، د ښځو د حقونو فعاله ، بهار خاموش وايي چي د ټولني چوپتيا د دې سبب سوې ده چي دا جرمونه عادي وګرځي، او ښځو د کار او زدهکړي له محروميت سره سره خپل د ژوند امنيت هم له لاسه ورکړی دی.
خاموش د معمار خبري اژانس سره په خبرو کي ويلي دي چي په افغانستان کي د ښځو وضعيت په بېساري ډول اندېښمنونکی سوی دی او د تاوتريخوالي پر وړاندې د جدي غبرګون نشتوالی د ناموسي وژنو د دوام او پراخېدو لپاره زمينه برابره کړې ده.
هغې زياته کړې ده: «کله چي ټولنه د وژنو او تاوتريخوالي پر وړاندې چوپ پاته سي، دا جرمونه کرار کرار عادي کيږي او ښځې هره ورځ لا زيات د ګواښ سره مخ کيږي.»
دې ښځينه فعالې همدارنګه له ښځينه فعالانو، مدني بنسټونو او عامو وګړو څخه غوښتي دي چي د ښځو پر وړاندي د تاوتريخوالي او ظلم په وړاندې چوپ پاته نه سي او د ښځو د حقونو او امنيت د دفاع لپاره خپل غږ پورته کړي.
د هغې په وينا، د افغانستان ښځې نن نه يوازي د زدهکړي او کار له حق څخه محرومي سوي دي، بلکي د شخصي امنيت او د خوندي ژوند حق هم تیرې اخيستل سوی دی.
