د پاکستان امنيتي چارواکو اعلان کړی دي چي په اسلاماباد کي د افغان کډوالو د پلټني او لټون د عملياتو پر مهال د پوليسو او يو شمېر کډوالو ترمنځ نښته رامنځته سوې ده، چي له امله يې څلور پوليس ټپيان سوي دي.
د اسلاماباد د پوليسو په وينا، دا پېښه هغه مهال تاوتريخوالي ته واوښته چي کډوالو د نيولو پر وړاندي مقاومت وکړ، او ورپسې لږ تر لږه ۲۳ افغان کډوال د ترهګرۍ اړوندو تورونو په تړاو نيول سوي دي.
د دان ورځپاڼې د راپور له مخي، دا پېښه د دوشنبې په ورځ د اسلاماباد د سرای خربوزې په سيمه کي د ګولرای پوليسو د پوستې په اړوند ساحه کي رامنځته سوې ده. د سرچينو په وينا، د دې نښتي پر مهال د کډوالو يوې ډلې، چي د مبين په نوم کس يې مشري کول، يو پوليس برمته کړی او په يوه کور کي يې ساتلی وو.
ثاقب محمود ، د دې سيمې د پوليسو يوه چارواکي ادعا کړې ده چي دغو کسانو وروسته ياد کور په اور سوځولي دی. همدارنګه د پوليسو په رسمي شکايت کي راغلي دي چي بريدګرو د يوه پوليس څخه يوه وسله اخيستې او د وژلو په نيت يې پر هغه ډزې کړې دي.
اوس مهال ۲۳ افغان کډوال د دې پېښي په تړاو بنديان دي، او د پوليسو په وينا، د دوی دوسيه د پاکستان د قوانينو له مخي، د ترهګرۍ ضد قانون د اوومي مادې په ګډون، تر څېړني لاندي ده.
د اسلاماباد پوليسو همدارنګه خبرداری ورکړی دي چي د ترهګرۍ ضد ادارې له خوا پراخ عمليات پيل سوي دي، څو هغه نور شکمن کسان وپېژندل او ونيسي چي له سيمې څخه تښتېدلي دي.
