د چين د بهرنيو چارو وزارت اعلان کړی دی چې د طالبانو او پاکستان استازو د څو ورځو خبرو وروسته، د شخړو د راکمولو لپاره د حل لارې د موندلو پر هڅو هوکړه کړې ده.
ماو نينګ، د چين د بهرنيو چارو د وزارت وياندې، د چهارشنبې په ورځ ۱۹ د حمل په يوه خبري ناسته کې وويل چې دواړو خواوو هوکړه کړې ده چې د نښتو د زياتېدو مخه ونيسي.
هغې زياته کړه چې چين به له دواړو خواوو سره خپلو دوامدارو اړيکو ته ادامه ورکړي او په همدې حال کې به د هغوی ترمنځ د خبرو د اسانتيا او دوام لپاره يو چوکاټ برابر کړي.
په همدې حال کې، يوې پاکستاني رسنۍ راپور ورکړی دی چې د دواړو هېوادونو پلاوي خپلو هېوادونو ته ستانه سوي دي او ټاکل سوې ده چې د عملي حل لارو د موندلو هڅې به رواني وساتل سي.
تر دې وړاندې، اميرخان متقي، د طالبانو د بهرنيو چارو وزير، هم ويلي وو چې د چين د اورومچي په ښار کې ترسره سویو خبرو اترو د پام وړ پرمختګ درلودي.
