د معمار خبري آژانس د راپور له مخي، د ايران د اسلامي جمهوريت هغه وړاندي سوی ۱۰ مادېز پلان چي د اوربند د هوکړې د بنسټ په توګه منل سوی دي، جزييات يې تشريح کړي دي.
دا پلان چي د جګړې د درولو وروستی چوکاټ ټاکي، يو شمېر مادې لري چي مهم ټکي يې په لاندي ډول دي:
پر ايران او د مقاومت پر ملګرو ډلو د هر ډول تېري بشپړ بندېدل.
له سيمې څخه د امريکا د جنګي ځواکونو وتل، له پوځي اډو څخه پر ايران د هر ډول بريد بندېدل، او د هر ډول جنګي چمتووالي له نيولو څخه ډډه کول.
د دوو اوونيو لپاره د هرمز له تنګي څخه هره ورځ د بېړيو محدود تګ راتګ، د خوندي تګ پروتوکول تر نامه لاندي، چي د دغه هېواد تر څارني او ځانګړو اصولو لاندي وي.
د لومړنيو، ثانوي او د ملګرو ملتونو د ټولو بنديزونو لغوه کېدل.
د پانګوني او مالي صندوق په جوړولو سره د ايران د تاوانونو پوره کول.
د ايران ژمنه چي اټومي وسله به نه جوړوي.
د امريکا له لوري د ايران د غني کولو حق منل، او د غني کولو د کچي په اړه خبرې اترې.
د ايران هوکړه چي د خپلو ګټو په چوکاټ کي د سيمې له هېوادونو سره د دوه اړخيزو او څو اړخيزو سولييزو تړونونو په اړه خبرې اترې وکړي.
د نه تېري اصل د ټولو هغو يرغلګرو پر ضد غځول چي د مقاومت د ټولو ډلو پر ضد تېری کوي.
د اټومي ادارې د شورا او د امنيت شورا د ټولو پرېکړه ليکونو پای ته رسېدل، او د ټولو ژمنو د ملګرو ملتونو په رسمي پرېکړه ليک کي تصويبېدل.
دغه باخبره سرچينې ټينګار کړی دي چي ايران تر دې مخکي د امريکا ۱۵ مادېز پلان رد کړی وو او د اوربند هر ډول درول يې د خپل وړاندي سوي پلان د منلو او د ټرمپ د رسمي هوکړې له اعلان سره تړلي وو، چي ټرمپ په رسمي ډول د ايران ۱۰ مادېز پلان منلی دي.
