د افغانستان او د مرکزي آسيا د هېوادونو مشورتي غونډه، چې سياسي، اقتصادي او امنيتي موضوعات پکښې تر بحث لاندې دي، د يکشنبې په ورځ ۱۶ حمل په کابل کې پيل سوه.
اميرخان متقي، د طالبانو د بهرنيو چارو وزير، د دې غونډي په پيل کې وويل چې د دغو مشورتي خبرو موخه د سيمهایزو بدلونونو ارزونه، د ديپلوماټيکو همغږيو زياتوالی او د همکاريو پراختيا ده.
هغه زياته کړه چې طالبانو او د مرکزي آسيا هېوادونو د دوهاړخيزو اړيکو د پياوړتيا او د اقتصادي، لېږد رالېږد او سيمهايزو همکاريو د پراختيا لپاره څرګند او اغېزمن ګامونه اخيستي دي.
د متقي په وينا، د طالبانو او د مرکزي آسيا د هېوادونو تر منځ اړيکي پر همکارۍ ولاړي دي، نه پر مخامخوالي.
دا غونډه په داسې حال کې ترسره سوه چې د طالبانو له خوا پر افغانستان د واکمن کېدو نږدې پنځه کاله تېر سوي، خو تر اوسه د مرکزي آسيا هېڅ هېواد دا ډله په رسميت نه ده پېژندلې.
سره له دې، طالبان هڅه کوي چې له سيمهایزو هېوادونو سره خپلې اړيکي پراخې کړي او د لا ډېرو همکاريو لپاره زمينه برابره کړي.
