ریچارد لندسي، د افغانستان په چارو کي د بریتانیا ځانګړی استازی، د پاکستان د وروستیو بریدونو په غبرګون کې د طالبانو او اسلامآباد څخه غوښتنه وکړه چې بېرته د خبرو میز ته ستانه سي.
لندسي په خپله اعلامیه کې چې په ایکس پاڼه کې خپره سوې، وویل چې وروستي شخړې او بریدونه ددی سبب سوي چې ملکي وګړي د دې شخړو تر ټولو دروند بار وزغمي.
هغه د ملکي وګړو د تلفاتو د زیاتوالي په اړه ژوره اندېښنه وښوده او ویی ویل:
«موږ د افغانستان او پاکستان د شخړو له امله د ملکي وګړو د تلفاتو د زیاتوالي، په شمول د کابل د شپې بریدونو، له کبله ژوره اندېښنه لرو.»
د بریتانیا ځانګړي استازي ټینګار کړی چې د تلفاتو د زیاتوالي او کړکېچ د پراختیا د مخنیوي لپاره، د دواړو اړخونو سمدستي بېرته خبرو ته ستنېدل او د شخړو کمول اړین دي.
