د معمار خبري اژانس د راپور له مخې؛ حافظ ضياء احمد چې د طالبانو د بهرنيو چارو وزارت مرستيال وياند دی، په يوه خپره کړې خبرپاڼه کې ويلي دي چې مولوي اميرخان متقي د دې وزارت دچارو سرپرست، د عمان د پاچاهۍ د بهرنيو چارو له وزير بدر بن حمد آل بوسعيدي سره په ټليفوني اړيکه کې خبرې کړې دي.
د خپرې سوې خبرپاڼې له مخې، دواړو لوریو په دې خبرو کې د افغانستان او عمان د اړيکو ترڅنګ د سوداګرۍ، د توکو د تېرېدو او د لېږد–رالېږد د برخو د مرستو پر پراخولو هم خبرې کړي دي.
په دې خبرو کې اميرخان متقي خپل وروستی سفر عمان ته ګټور بللی او ويلي يې دي چې د دواړو هېوادونو د استازو تګ–راتګ د بېلابېلو برخو د مرستو د ډېروالي لپاره ارزښتمن دی. هغه د عمان د بهرنيو چارو له وزير څخه هم په مناسب وخت کې کابل ته د راتګ غوښتنه کړې، او زياته کړې يې ده چې د دواړو هېوادونو د مشرانو ترمنځ د لوړې کچې خبرې کولای سي د دواړو لورو لپاره ګټورې تمامې سي.
بل لور ته، د عمان د بهرنيو چارو وزير بدر بن حمد آل بوسعيدي هم د کابل او مسقط ترمنځ د استازو تګ–راتګ د دوهاړخیزو مرستو د پراخېدو لپاره ارزښتمن بللی، او ويلي يې دي چې ډېر ژر به د عمان د هوايي ګرځېدو د څار تخنيکي پلاوی کابل ته راسي. هغه همدارنګه ويلي دي چې دی هم په مناسب وخت کې کابل ته د راتګ چمتووالی لري او هيله يې ښکاره کړې ده چې دا سفر به د دواړو هېوادونو ترمنځ د مرستو د زیاتوالی لپاره لا ښې پايلې وزېږوي.
