د «انګور اډې» پوله د افغانستان او پاکستان ترمنځ له دوو کلونو وروسته بېرته پرانیستل سوه

د معمار خبري آژانس د راپور له مخې؛ محمد صادق، د افغانستان لپاره د پاکستان ځانګړي استازي، اعلان کړی چې د «انګور اډې» پوله د افغانستان او پاکستان ترمنځ، له دوه کلن ځنډ وروسته، د ترانزیټ او وسایطو د تګ راتګ لپاره بېرته پرانیستل سوې ده. نوموړي د پنج‌شنبې په ورځ، د میزان په ۱۰مه، په ټولنیزه شبکه «ایکس» کې په یوه پیغام کې لیکلي چې دا اقدام کولی سي د دواړو هېوادونو ترمنځ د اقتصادي او ترانزیټي فعالیتونو د پراختیا سبب سي. هغه ټینګار کړی چې د دې پولې پرانیستل د کابل او اسلام‌اباد ترمنځ د سوداګریزو اړیکو د پیاوړتیا لپاره یو عملي ګام ګڼل کېږي. د پکتیکا ولایت د «انګور اډې» پوله د افغانستان او پاکستان ترمنځ له مهمو پولو څخه ده چې په وروستیو کلونو کې د سیاسي او امنیتي ترینګلتیاوو له امله څو ځله تړل سوې او بېرته پرانیستل سوې ده. د یادونې وړ ده چې د افغان مهاجرینو د شړلو لړۍ هم د همدې پولې له لارې عملي کېږي. دا په داسې حال کې ده چې، د افغانستان په ختیځ کې ځايي سرچینو خبر ورکړی چې د کونړ ولایت په پوله کې د طالبانو د سرحدي ځواکونو او د پاکستاني پوځیانو ترمنځ نښتې رامنځته سوې دي. تر اوسه رسمي چارواکو دې راپورونو ته غبرګون نه دی ښودلی.