پرله‌پسې څلور کاله د افغانستان نشتوالی په عمومي اسامبله کې

د معمار خبري آژانس د راپور له مخې؛ سږکال هم د ملګرو ملتونو د عمومي اسامبلې د اتیایمې کلیزې په مناسبت د افغانستان څوکۍ پرله‌پسې څلور کاله تشه پاتې سوه. نصیر فایق، چې په دې سازمان کې د افغانستان استازی دی، وویل د مشروع او قانوني حکومت نشتوالي افغانستان په نړیواله کچه منزوی کړی دی. هغه ټینګار وکړ چې لکه د تېرو درېو کلونو په څېر، سږکال هم هېڅ استازی د هېواد له لوري د مشرانو په ناسته کې ګډون ونه کړ. له هغه وروسته چې د پخواني جمهوریت نظام ۲۰۲۱ کال اګسټ کې سقوط وکړ، د افغانستان هېڅ پلاوي د عمومي اسامبلې په اصلي غونډو کې ګډون نه دی کړی. سره له دې، ملګرو ملتونو فایق ته اجازه ورکړې چې د افغانستان په استازیتوب د امنیت شورا په غونډو کې خبرې وکړي. طالبان، چې د ملګرو ملتونو له خوا لا تر اوسه په رسمیت نه دي پېژندل سوي، د افغانستان څوکۍ د ترلاسه کولو په هڅو کې ناکام پاتې سوي دي. فایق د هېوادونو د لیدلورو بدلون ته په اشارې وویل: «هغه هېوادونه چې یو وخت خوش‌بین ول، اوس د دې ډلې په اړه د تعامل پر اصل هم شک لري.» هغه خبرداری ورکړ چې افغانستان د افراطیت او ترهګرۍ پر لور روان دی. په داسې حال کې چې افغانستان نه یوازې په لوړ کچو غونډو کې غایب دی، بلکې د کلني حق العضویت د نه ورکړې له امله د عمومي اسامبلې د رأیې ورکولو حق یې هم له لاسه ورکړی دی. ملګرو ملتونو اعلان وکړ چې افغانستان د کلني حق‌العضویت د نه ورکړې له امله یو ځل بیا د عمومي اسامبلې د رأیې ورکولو حق له لاسه ورکړی دی. د دې سازمان د منشور له مخې هغه هېوادونه چې له دوه کلونو زیات مالي برخه ورنه کړي، په اتومات ډول د رأیې ورکولو له حقه بې‌برخې کېږي. د افغانستان کلنی حق‌العضویت شاوخوا ۲۰۰ زره ډالر دی، خو په تېرو درېو کلونو کې نه دی ورکړل سوی او اوس له ۹۰۰ زره ډالرو څخه زیات سوی دی.