د اقتصادي کمېسیون په غونډه کې، د هېواد پر یو لړ مهمو موضوعاتو بحث وشو

د معمار آژانس د خبر له مخې؛ د اقتصادي معاونیت مطبوعاتي دفتر نن د یوې خبرپاڼې په خپرولو سره ویلي چې په غونډه کې تر هر اړخیز بحث وروسته، پرېکړه وشوه چې دکانونو او پټرولیم وزارت دې د تخار چاه آب ولسوالۍ د سمتي سیمې سرو زرو کان آزادې داوطلبۍ ته وسپاري.
دغه راز د اقتصادي کمېسیون له لوري د اوبو او انرژۍ وزارت ته سپارښتنه شوې چې له هندي شرکت سره د ارغستان بند جوړولو قرارداد د ملي تدارکاتو کمېسیون لخوا فسخه کړي او د یاد بند د سروې، ډیزاین او ساختماني چارو کارونه دې آزادې داوطلبۍ له لارې پرمخ یوسي.
همدارنګه په یاده ناسته کې د مالیې، صنعت او سوداګرۍ او اقتصاد وزارتونو او د چارو ادارې لوی ریاست او د ریاست الوزرا اقتصادي معاونیت له استازیو څخه ګډې جوړې شوې کمېټې ته دنده سپارل شوې، چې د دولتي شرکتونو په اړه د افغانستان اسلامي امارت د مشرتابه عالي مقام، د ریاست الوزرا مقام، کابينې او اقتصادي کمېسیون ټول حکمونه او پرېکړې په هر اړخیز ډول وڅېړي.
یاده کمېټه دې د دولتي شرکتونو قانون، جوړښت، مدیریت، نظارت او نورو اړوندو اړخونو ته کتنه وکړي او دا دې جوته کړي چې د دولتي شرکتونو اوسنی جوړښت مؤثر دی او که نه. دغه راز نوموړې کمېټه به په دې اړه هر اړخیزه طرحه برابره او اقتصادي کمېسیون ته یې وړاندې کړي.