سمیع سادات، فرمانده پیشین نیروهای ویژهٔ ارتش افغانستان، می‌گوید که پیش از تأسیس «جبهه متحد افغانستان»، چندین بار با احمد مسعود، رهبر جبهه مقاومت ملی افغانستان، در تاجیکستان دیدار کرده؛ اما پیشنهاد او برای تشکیل ائتلاف با این جبهه پذیرفته نشده است.
سادات در مصاحبه‌ای که به‌تازگی منتشر شده، گفته است که شماری از شهروندان افغانستان در ترکیه از او خواسته بودند رهبری مخالفان طالبان را بر عهده بگیرد و دربارهٔ چگونگی مقابله با این گروه تصمیم‌گیری کند.
به گفتهٔ او، این افراد پس از آگاهی از سفرش به تاجیکستان برای گفت‌وگو دربارهٔ تشکیل ائتلاف با جبهه مقاومت، از تصمیم او ابراز نارضایتی کردند. سادات افزوده است که این افراد او را به‌عنوان رهبر خود انتخاب کرده بودند.
سادات می‌گوید که «جبهه متحد افغانستان» را در اکتوبر ۲۰۲۳ تأسیس کرده است. او مدعی است که این تشکل فعالیت‌های نظامی خود را از ماه اگست آغاز کرده و دامنهٔ فعالیت‌هایش را به ۲۲ ولایت افغانستان گسترش داده است.
به گفتهٔ سادات، این جبهه در دوونیم ماه گذشته ۱۰۰ عملیات انجام داده که به ادعای او، تنها دو مورد تلفات در پی داشته است.
