به گزارش خبرگزاری معمار؛ محمد اسحاق دار، وزیر امور خارجه پاکستان روز دوشنبه ۲۷ میزان برای رهبری هیئت پاکستانی در نشست شورای سران دولت‌های سازمان همکاری شانگهای وارد دوشنبه، پایتخت تاجیکستان، شد.
نشست شورای سران دولت‌های سازمان همکاری شانگهای در روزهای ۱۹ و ۲۰ اکتبر (۲۷ و ۲۸ میزان) در شهر دوشنبه برگزار می‌شود.
وزارت خارجه پاکستان گفته است که اسحاق دار هنگام ورود به دوشنبه از سوی دلیر جمعه، وزیر انرژی و منابع آبی تاجیکستان و رئیس مشترک کمیسیون مشترک پاکستان و تاجیکستان و شماری از مقام‌های ارشد دولت تاجیکستان استقبال شد.
انتظار می‌رود رهبران و مقام‌های کشورهای عضو سازمان همکاری شانگهای در این نشست درباره همکاری‌های اقتصادی، تجاری، ترانزیتی و موضوعات منطقه‌ای مورد علاقه مشترک گفت‌وگو کنند.
