کارگران چینی پس از چند ماه وقفه ناشی از نگرانیهای امنیتی، کار ساخت بخشی از شاهراه دوشنبه–کولما در نزدیکی مرز تاجیکستان با افغانستان را از سر گرفتهاند.
این پروژه سال گذشته متوقف شد؛ زمانی که دولت چین در پی حملات مرگبار علیه شهروندانش، کارکنان خود را از مناطق مرزی تاجیکستان خارج کرد.
در سال گذشته، دو حمله جداگانه جان شماری از شهروندان چینی را در تاجیکستان گرفت. در نخستین رویداد که در ماه عقرب رخ داد، افراد مسلح ناشناس در دره زربوزی ولسوالی شمسالدین شاهین به گروهی از شهروندان چین حمله کردند. در نتیجه این حمله، یک شهروند چینی کشته و پنج تن دیگر، از جمله چهار شهروند چینی، زخمی شدند.
چند هفته بعد، وزارت خارجه تاجیکستان اعلام کرد که اردوگاه کارکنان شرکت «شاهین اسام» در ولسوالی شمسالدین شاهین ولایت ختلان، در شب پنجم قوس، در حملهای که به گفته این وزارت از خاک افغانستان انجام شده بود، هدف قرار گرفت. در این حمله نیز سه شهروند چینی کشته و یک نفر دیگر زخمی شد.
وزارت خارجه تاجیکستان ضمن محکوم کردن این حمله، اعلام کرد که گروههای جنایتکار مستقر در افغانستان در آن دست داشتهاند.
اکنون، بیش از هفت ماه پس از این رویدادها، مقامهای تاجیکستان به بیجینگ اطمینان دادهاند که تدابیر امنیتی برای حفاظت از کارگران و پروژههای چینی را تقویت خواهند کرد.
همزمان، وزارت دفاع تاجیکستان از برگزاری یک رزمایش مشترک میان نیروهای امنیتی تاجیکستان و چین در ماه سپتامبر خبر داده است؛ اقدامی که در راستای تقویت همکاریهای امنیتی میان دو کشور ارزیابی میشود.
تاجیکستان و چین همچنین در ماه می پیمان دوستی امضا کردند؛ توافقی که زمینه انعقاد قراردادهایی به ارزش هشت میلیارد دالر با شرکتهای چینی را فراهم کرده است.
