به گزارش خبرگزاری معمار؛ یوسف وفا، والی طالبان در ولایت بلخ، روز پنج‌شنبه، به تاجیکستان سفر کرد و در دیدار با مقام‌های این کشور خواستار برقراری روابط دیپلماتیک میان کابل و دوشنبه شد.
بر بنیاد گزارش‌ها، در این دیدارها، والی طالبان تأکید کرده است که همکاری‌های منطقه‌ای برای مقابله با تهدیدهای امنیتی ضروری است. او افزوده که ثبات در افغانستان به نفع تمام کشورهای همسایه است و هرگونه ناامنی در خاک افغانستان می‌تواند اثرات منفی فرامرزی داشته باشد.
یوسف وفا همچنین بر لزوم گسترش همکاری‌های اقتصادی، امنیتی و سیاسی با کشورهای آسیای مرکزی، به‌ویژه تاجیکستان، تأکید کرده و خواهان باز شدن فصل جدیدی در روابط میان دو کشور شده است.
این سفر در حالی انجام می‌شود که روابط طالبان با تاجیکستان از زمان بازگشت این گروه به قدرت، پرتنش و سرد گزارش شده و دولت تاجیکستان همواره از حضور گروه‌های افراطی در افغانستان ابراز نگرانی کرده است.