به گزارش خبرگزاری معمار؛ اشرف حق‌شناس، سخنگوی وزارت فواید عامهٔ حکومت طالبان، از ورود نخستین محمولهٔ تیل دیزل از مسیر خط‌آهن خواف–هرات خبر داده است.
سخنگوی وزارت فواید عامهٔ حکومت طالبان روز دوشنبه، ۵ عقرب، در صفحهٔ اکس خود نوشته است: «برای نخستین‌بار، ۲۰ واگن تیل دیزل (۰۲) به وزن مجموعی ۱۱۲۰ تُن، مربوط به یکی از شرکت‌های خصوصی، شام روز گذشته از مسیر خط‌آهن خواف–هرات وارد ایستگاه روزنک ولایت هرات گردید.»
حق‌شناس افزود که وزارت فواید عامهٔ طالبان تلاش دارد با اجرای پروژه‌ها و گسترش شبکهٔ خط‌آهن در کشور، زمینهٔ انتقالات آسان‌تر و تسهیلات بیشتر برای تاجران را فراهم کند.
به گفتهٔ مقام‌های طالبان، راه‌اندازی و استفاده از مسیر ریلی خواف–هرات می‌تواند نقش مهمی در کاهش هزینهٔ ترانزیت، افزایش مبادلات تجارتی و اتصال افغانستان به بنادر و بازارهای منطقه‌ای ایفا کند.