به گزارش خبرگزاری معمار؛ وزارت امور خارجه طالبان با ابراز تأسف و همدردی عمیق به جمهوری خلق چین و جمهوری تاجیکستان، کشته‌شدن سه شهروند چینایی در منطقه شمس‌الدین شاهین ولایت ختلان تاجیکستان را یک رویداد ناگوار و به‌شدت محکوم‌شدنی خوانده است.
در اعلامیه‌ای که از سوی وزارت امور خارجه نشر شده، آمده است که امارت اسلامی مراتب تسلیت خود را به خانواده‌های قربانیان ابراز کرده و این حادثه را به شدت محکوم می‌نماید.
بر اساس ارزیابی و معلومات ابتدایی نهادهای ذیربط افغانستان، نشانه‌هایی از دست‌داشتن حلقاتی دیده می‌شود که در تلاش ایجاد هرج‌ومرج، بی‌ثباتی و بی‌اعتمادی میان کشورهای منطقه هستند.
وزارت خارجه تأکید کرده است که دولت افغانستان آماده همکاری همه‌جانبه با دولت تاجیکستان می‌باشد و برای تبادل اطلاعات، همکاری تخنیکی و انجام ارزیابی مشترک به منظور روشن‌شدن علت‌ها و عوامل این رویداد، آمادگی کامل دارد.
در پایان بیانیه وزارت آمده است افغانستان بار دیگر مراتب تسلیت و همدردی خود را با خانواده‌های جان‌باختگان ابراز کرده است.
