به گزارش خبرگزاری معمار؛ در ادامه‌ی تلاش طالبان در راستای تقویت روابط منطقه‌ای، شرف‌الدین گدایف، رهبر اپوزیسیون تاجیکستان و مخالف امام‌علی رحمان که به دعوت طالبان در کابل حضور دارد، با رسانه‌های نزدیک به این گروه گفتگو کرده است.
گدایف در این مصاحبه، حکومت امام‌علی رحمان را «نامشروع»، «غیردموکراتیک» و «ضد اسلام» خوانده و ادعا کرده که دوشنبه، نه‌تنها با نهادهای دینی و مدارس مذهبی مخالفت می‌کند، بلکه در تولید و صدور افراط‌گرایی از نوع داعش نیز نقش مستقیم دارد.
وی اظهار داشت: «تاجیکستان به‌صورت سیستماتیک نهادهای دینی را سرکوب کرده، علمای دین را زندانی ساخته و اسلام را دشمن اصلی خود می‌داند. چگونه چنین حکومتی می‌تواند ادعای مردمی بودن داشته باشد؟»
او همچنان مدعی شد که ساختارهای امنیتی حکومت تاجیکستان در ایجاد و حمایت از گروه‌های تروریستی، به‌ویژه در مرزهای افغانستان و تاجیکستان، نقش دارند. وی گفت: «امروز که داعش در منطقه حضور دارد، باید دید که این گروه از کجا تغذیه و توسط چه نهادهایی تجهیز می‌شود. واقعیت‌ها نشان می‌دهند که منابع آن از داخل تاجیکستان می‌آیند.»
شرف‌الدین گدایف از رهبران برجسته حزب نهضت اسلامی تاجیکستان است که فعالیت‌هایش در تاجیکستان از سوی دولت غیرقانونی اعلام شده و بسیاری از اعضای آن تحت پیگرد قرار گرفته‌اند. وی اکنون از سوی طالبان به‌عنوان بخشی از سیاست منطقه‌ای‌شان در کابل میزبانی می‌شود.
این در حالی‌ست که از زمان روی‌کارآمدن دوباره طالبان در افغانستان، شماری از مخالفان سیاسی کشورهای از تاجیکستان و ازبکستان، روابط نزدیکی با طالبان برقرار کرده‌اند و حتی برخی از آن‌ها اجازه فعالیت‌های محدود رسانه‌ای یا نشست‌های سیاسی در کابل را یافته‌اند.
تا زمان نشر این خبر، دولت تاجیکستان هیچ واکنشی در برابر اظهارات شرف‌الدین گدایف و دعوت او به کابل نشان نداده است.
