سفیر روسیه در تاجیکستان می‌گوید ناتو کشوری را پشت سر گذاشت که اکنون به پایگاه گروه‌های تروریستی بین‌المللی تبدیل شده است.
به گزارش خبرگزاری معمار؛ سمیون گریگوریف،سفیر روسیه در تاجیکستان گفته است تروریست‌ها در مرز افغانستان و تاجیکستان جابجا شده‌اند و امنیت همه کشورهای مشترک‌المنافع و سازمان پیمان امنیت جمعی را تهدید می‌کنند.
در صفحه فیسبوک سفارت روسیه در دوشنبه، پایتخت تاجیکستان آمده است که سمیون گریگوریف این اظهارات را روز چهارشنبه ۲۶ دلو، در مراسمی به مناسبت گرامیداشت از سالگرد خروج نیروهای شوروی از افغانستان بیان کرده است.
این مراسم در نزدیکی بنای الکساندر میروننکو، قهرمان اتحاد جماهیر شوروی، در دوشنبه برگزار شده بود.
سفیر روسیه در دوشنبه در این مراسم گفت: امروز پایگاه نظامی ۲۰۱ روسیه در تاجیکستان ضامن امنیت نه تنها تاجیکستان، بلکه تمام متحدان خود است.
پایگاه نظامی ۲۰۱ یکی از بزرگ‌ترین مراکز نظامی روسیه در خارج از این کشور است. این پایگاه در تاجیکستان در نزدیکی افغانستان قرار دارد.
آناتولی سیدوروف، رئیس ستاد مشترک سازمان پیمان امنیت جمعی دو روز پیش اعلام کرد که شمار جنگجویان شاخه خراسان داعش در افغانستان به ۶۵۰۰ نفر رسیده است. او روز سه‌شنبه ۲۵ دلو، در یک نشست خبری گفت که از این تعداد ۴ هزار جنگجوی داعش در نزدیکی مرز تاجیکستان مستقر شده‌اند.
