به گزارش خبرگزاری معمار؛رهبر غایب گروه طالبان در تعیینات جدید خود، محمد قاسم خالد، والی پیشین ولایت نیمروز را به حیث معین مبارزه با مواد مخدر وزارت داخله این گروه منصوب کرد.
ذبیح‌الله مجاهد، سخنگوی گروه طالبان، امروز دوشنبه (۲۱ میزان) در صفحه اکس خود نوشته است که بر اساس حکم ملا هبت‌الله، رهبر غایب این گروه، محمد قاسم خالد، والی پیشین ولایت نیمروز به حیث معین مبارزه با مواد مخدر وزارت امور داخله و محمد وزیر بادشاه به حیث معین تأمینات این وزارت تعیین شده‌اند.
در حکم رهبر طالبان، عبدالحق همکار، معین پیشین مبارزه با مواد مخدر وزارت امور داخله، به حیث معین مالی و اداری وزارت فواید عامه، محمد امین جام عمری، والی پیشین ولایت بادغیس، به حیث معین مالی و اداری وزارت مخابرات و تکنالوژی معلوماتی، عبدالقیوم روحانی، والی پیشین ولایت خوست، به حیث قوماندان قول اردوی ۲۰۳ منصوری و محمد حنیف حمزه، معین پیشین مالی و اداری وزارت مخابرات، به حیث والی ولایت بادغیس منصوب شده است.
رهبر گروه طالبان، عبدالمنان محمود، رئیس پیشین ارکان قول اردوی مرکزی ۳۱۳ را به حیث والی ولایت نیمروز، عبدالله مختار، معین پیشین تأمینات وزارت امور داخله را به حیث والی ولایت خوست، محمد اسماعیل راسخ، قوماندان پیشین قول اردوی ۲۰۳ منصوری را به حیث قوماندان امنیه ولایت جوزجان، محب‌الله حماس، معاون پیشین ولایت زابل را به حیث قوماندان امنیه ولایت ننگرهار و سیدالرحمن، معاون پیشین ولایت میدان وردک را به حیث معاون ولایت زابل تعیین کرد.
بر اساس حکم رهبر طالبان، فریدالله قیام، قوماندان پیشین امنیه ولایت ننگرهار، به حیث معاون ولایت میدان وردک، سردار محمد مدنی، رئیس پیشین سرحدات و قبایل ولایت لوگر، به حیث معاون ولایت غزنی، عبدالستار صابر، قوماندان پیشین امنیه ولایت جوزجان، به حیث رئیس ارکان قول اردوی مرکزی ۳۱۳ و عبدالرشید، معاون پیشین ولایت غزنی، به حیث شاروال ولایت خوست منصوب شده است.
