چین: افغانستان باید د جیوپولیټیک سياليو ډګر نه بلکې د نړیوالو همکاریو په ډګر بدل شي

د چین د بهرنیو چارو وزیر وانګ يي په افغانستان کې د ترهګرۍ د له منځه وړلو لپاره د شانګهای د همکاریو د سازمان او د سیمې د هېوادونو ترمنځ د ګډې همکارۍ پر اړتیا ټینګار وکړ. هغه وويل: “افغانستان بايد د نړيوالو همکاريو په پلاتفورم بدل شي، نه د جيوپوليټيکي سياليو ډګر.” هغه ټینګار وکړ چې موږ باید د ترهګرو خوځښتونه له نږدې تعقیب کړو او د معلوماتو له تبادلې او شریکولو څخه ګټه پورته کړو. نوموړي له ترهګرۍ سره پر مبارزې د ټينګار تر څنګ د افغانستان له بيارغونې ملاتړ وکړ او د سيمه ييزو اقتصادي او سوداګريزو همکاريو د پياوړتيا او د سيمې په سترو پروژو کې يې د افغانستان ګډون مهم وباله. نوموړي دغه راز د افغانستان د وضعیت په ښه کولو کې د ملګرو ملتونو او د شانګهای د همکارۍ سازمان پر رول هم رڼا واچوله.