عاکف مهاجر؛ نږدې ۱۱۰۰۰ شکایتونه ثبت شوي او له ۷۰۰۰ څخه ډیر یې څېړل شوي دی

د معمار پرس د خبر له مخې؛ د امر بالمعروف او نهی عن المنکر وزارت د حکومت د حساب ورکونې په پروګرام کې ملت ته داسې احصایې وړاندې کړې چې په تېر کال کې په بېلابېلو څانګو کې شاوخوا ۱۱ زره شکایتونه ثبت شوي چې له دې ډلې له ۷ زرو ډېر یې څېړل شوي دي. د دغه وزارت ویاند عاکف مهاجر وايي، دغه شکایتونه د میراث، اجباري ودونو او یو شمېر نورو مسلو په تړاو وو. سربیره پردې، د امر بالمعروف او نهی عن المنکر وزارت د منکراتو د مخنیوي لپاره په بیلابیلو سکتورونو کې د یوولس محدودیتونو د لګولو خبره کوي. دغه وزارت په هېواد کې د جبري ودونو د قضیو د مخنیوي اعلان هم وکړ او ټینګار یې وکړ چې له داسې کسانو سره به قانوني چلند وکړي.