د معمار وحدت د خبری آژانس د خبر له مخې؛ د دغه قانون له مخې، ښځینه محصلین باید په طاق ورځو او نارینه محصلان په جفت ورځو پوهنتون ته راشي او د سهار له اتو بجو څخه د مازدیګر تر څلورو بجو پورې زده کړې وکړي.
د بلخ په پوهنتون کې د محصیلینو لپاره د جفت او طاق قانون تطبیق له نن شنبې ورځې راهیسې پیل شوی او د دغه قانون له مخې باید ښځینه محصلین په طاق ورځو او نارینه محصلین په جفت ورځو پوهنتون ته راشي.
خو محصلین دغه قانون له محصلینو سره ظلم ګڼي او ټینګار کوي چې په اونۍ کې درې ورځې خپل درسونه بشپړ نه شي لوستلی او باید دغه قانون لغوه شي.
په همدې حال کې د بلخ پوهنتون مسوولین وايي، چې دا یوه متخصصه پرېکړه ده او د محصلینو د زده کړي لپاره کومه ستونزه نه لري.
د بلخ پوهنتون رئیس خلیل الله کلیوال وویل: قانون د لوړو زده کړو وزارت نه دی او د بلخ پوهنتون دغه پرېکړه د نارینه او ښځینه محصلینو د اختلاط د مخنیوي په موخه کړې ده.
د تېر کال د اګسټ له ۱۵مې په افغانستان کې د طالبانو له واکمنۍ وروسته تر دې دمه د دغې ډلې پالیسي له شپږم ټولګي څخه پورته د نجونو د زده کړې د مخنیوي، په پوهنتونونو کې د جنسیتي جلاولي او له ځینو دندو د ښځو ګوښه کول له کورنیو او بهرنیو اعتراضونو سره مخ شوي دي.
