د معمار پرس د خبر له مخې؛ د پاکستان د بهرنیو چارو وزارت اعلان وکړ چې کابل ته د افغانستان لپاره د دغه هېواد د ځانګړي استازي محمد صادق خان سفر د امنیتي اندیښنو او د اړیکو پیاوړتیا باندې متمرکز و.
د پاکستان د بهرنیو چارو وزارت په دوام کې وویل چې دا سفر، چې د پاکستان د بهرنیو چارو وزیر اسحاق ډار په امر د ۱۴۰۴ کال د حمل له لومړۍ څخه تر دریمې پورې ترسره شو، په پاکستان کې د مخ په زیاتیدونکي ناامنۍ او د طالبانو له چارواکو سره د خبرو اترو په موخه پلان شوی و.
د وزارت په اعلامیه کې ویل شوي چې صادق خان د افغانستان سره د ګټورو اړیکو د دوام لپاره د پاکستان پر ژمنې ټینګار وکړ او د دوه اړخیزو اړیکو د پیاوړتیا لپاره یې د اندیښنو مسلو، په ځانګړې توګه امنیت، د حل غوښتنه وکړه.
اسحاق ډار هم د دې خبرو اترو له پایلو څخه رضایت څرګند کړ او د لوړې کچې تعاملاتو او د سوداګرۍ او ټرانزیټ همکارۍ پراختیا له لارې د اړیکو د پیاوړتیا لپاره لارښوونې خپرې کړې.
