د معمار وحدت د خبري اژانس د راپور له مخې، دوی د “د هزاره ګانو نسل وژنه بنده کړئ” او “هزاره کېدل جرم نه دی” شعارونه ورکول او د کاج پر ښوونځي د وروستي برید په ګډون یې د هزاره ګانو پر وړاندې د بریدونو د قربانیانو لپاره د عدالت غوښتنه کوله.
لاریون کوونکو د کاج ښوونځي د قربانیانو په یاد کې شمعې بللې. په دغه برید کې شاوخوا ۶۰ زده کوونکي، چې ډېری یې نجونې وې، ووژل شول.
د کاج پر ښوونځي برید په نړیواله کچه د اعتراضونو لامل شو.
د هاګ د محکمې مخې ته يو لاريون کوونکي وويل، څه باندې سل کاله کېږي چې افغان هزاره ګان د قومي هويت له امله قرباني کیږي.
هغه وايي چې افغان هزاره ګان په جوماتونو، کورسونو، ښوونځيو او د لوبو په ميدانونو کې وژل کېږي. د دغه مظاهره کوونکي په وینا، د قربانیانو جرم «هزاره کیدل» دی.
لاریون کوونکي له ملګرو ملتونو او د جرمونو له نړیوالې محکمې غوښتنه کوي چې د هزاره ګانو “نسل وژنه” په رسمیت وپېژني او هغه ودروي.
د شنبې په ورځ (د میزان 16مه) چې د اکتوبر له اتمې نیټې سره برابره ده، د نړۍ په لسګونو هیوادونو او ښارونو کې د هغه څه پر ضد چې د هزاره ګانو د نسل وژنې په نوم یادیږي، مظاهرې وشوې. دغه لاريونونه په ځينو هېوادونو کې دوام لري.
“د هزاره ګانو نسل وژنه بنده کړئ” د دغو لاریونونو اصلي شعار .
