د طوفان الاقصی کلیزه؛ او اشغالګرانو ډوبیدل د تباهۍ په دلدل کې

یو کال مخکې د فلسطین د مقاومت جنګیالیو په نیواک شویو سیمو کښې داسې عملیات ترسره کړل چې صهیونیسټ رژیم یې تصور هم نه شواي کولای. داسې عمل چې د دښمن ټولې د مخنیوي او بې شکه امنیت ادعاوې یې شنډې کړې. د حماس مجاهدین د حیرانتیا اقداماتو له اصولو څخه په استفادې سره وتوانیدل چې صهیونیسټي غاصبانو ته مرګوني ګوزارونه ورکړي او خپله نه ماتېدونکی ثابت کړي. صهیونیسټانو چې ځانونه په سیمه کې تر ټولو غوره ځواک ګڼل، د غزې په شان له یوې وړې جغرافیې څخه دا ډول ماتې نشواي زغملای، نو د دغې امنیتي او سیاسي تشې د ترمیمولو لپاره یې د وژنو، نسل وژنې او د بنسټونو په ویجاړولو لاس پورې کړ. صهیونیسټي نیواک په تیر یو کال کښې ترټولو ستر جنګي جنایتونه ترسره کړل چې په نتیجه کښې یې څه دپاسه ۴۲ زره تنه شهیدان او په زرګونو نور ژوبل شول. اسراییل یو جعلي هیواد دی چې یو تروریستي دولت دی چې بنسټ یې پر غصب ولاړ دی او د دې ناروا وجود د ساتلو لپاره یې په وژنو او بمباریو سره خپلې ټولې هڅې کوي. د طوفان الاقصی عملیات د خپلواکۍ د غوښتلو په لاره کښې یو بشپړ حسابی اقدام وو ځکه صهیونیسټی دښمن د غزې خلکو محاصره کړی او د دغې سیمې په اوسیدونکو باندې د ظلم او فشار لړۍ ورځ په ورځ سختوی. فلسطيني جنګياليو په دغه ډول عملياتو سره نيواکګرو ته مرګوني ګوزارونه وکړل چې د صهيونيسټانو دروغجن تسلط يې له منځه يووړ. اسراییلو ادعا وکړه چې د دوی د مخنیوي، امنیت او اطلاعاتو جوړښت په لوړه کچه او له کومې ستونزې پرته دی او دا چې ځواکمن هیوادونه د دوی د مقابلې توان نه لري، خو طوفان الاقصی په څرګنده ثابته کړه چې دصهیونیسټ دښمن ټولې ادعاګانې تبلیغاتي او د ماتې وړ دي. نن ورځ اسراييل په نړۍ کې د يو وحشي او تروريستي دولت په توګه معرفی شوی ده. نړۍ په دې ښه پوه شوې چې صهیونیسټانو نه یوازې دا چې نړیوالو قوانینو ته غاړه نه ده ایښې، بلکې له بشري اصولو یې هم سرغړونه کړې ده. له بلې خوا، اسراییل په غزه کې د جنګي جنایتونو په ترسره کولو سره، ځان د سقوط او د مقاومت محور د محاصرې په دلدل کې اچولی دی. که څه هم صهیونیسټان د مقاومت د قوماندانانو د نسل وژنې او وژلو په ترسره کولو کښې بریالي شوي دي خو د مقاومت د محور هوډ د دغه ماشوم وژونکي رژیم په مقابل کښې د پخوا په پرتله زیات ګروهمن شوی دی او د غاصبانو د له منځه وړلو پورې به ونه دریږي. طوفان الاقصی له غمونو او کړاوونو سره سره له فلسطینیانو ته دا زیری ورکړ چې د نیواکګرو ماتې ممکنه ده او د اسرائیلو ښکاره ځواک به د مسلمانانو په اجتماعی ارادې سره له سقوط سره مخ شی. د نړۍ مسلمانان او آزاد خلک باید د فلسطین د ارمان په تحقق کې سره یو ځای شي او د مقاومت د مبارزینو په بریا کې فعال رول ولوبوي تر څو د مسلمانانو له سپېڅلې خاورې څخه دغه ناوړه استکبار له منځه ولاړ شي.