د طالبانو د حکومت د رسمیت پيژندلو نشتوالي اسرار او د افغانانو زیانمنتیا

د طالبانو د واکمنۍ له درې کالو څخه زیات وخت وروسته، هیڅ هیواد یا نړیوال سازمان د دغې ډلې حکومت په رسمیت نه دی پیژندلی. په دې موده کې د طالبانو د حکومت د رسمیت پيژندلو نشتوالي د افغانستان خلکو ته ډیر زیانونه اړولي او په نړیواله کچه د انزوا او د هیواد نړیوال دریځ یې کمزوری کړی دی. وروسته له هغه چې طالبانو پر افغانستان واک تر لاسه کړ، نړیوالې ټولنې تل پر دې ټینګار کړی دی چی دوی به د یوه جامع حکومت تر جوړېدو، د هېوادوالو او په ځانګړې توګه د ښځو حقونو ته د درناوي او له ترهګرۍ سره د مبارزې په برخه کې د کابل د جدي هوډ تر وخته د دغې ډلې اوسنی حکومت په رسمیت ونه پېژني. خو د طالبانو حکومت په دغو مواردو کې د نړیوالو غوښتنې په ردولو سره ادعا کوي چې د دوی اوسنی حکومت ټول شموله او د افغانستان د ټولو خلکو استازیتوب کوي. په هر صورت، منتقدین د طالبانو اوسنی حکومت “مونو توکمیز” او “مونو ګروپ” ګڼي، چې په خپل جوړښت کې ټولنیز عدالت نه ورکوي. طالبان لا هم د ښځو د وضعیت په اړه وايي چې د دې ډلې حکومت د دوی حقوق د اسلامي شریعت پر بنسټ برابروي. دا په داسې حال کې ده چې تر دې وړاندې هم د یو شمېر اسلامي هېوادونو استازو او د اسلامي نړۍ د دیني عالمانو په وار وار کابل ته د سفر پر مهال په افغانستان کې د ښځو لپاره د تعلیم او کار د حق غوښتنه کړې ده. په افغانستان کې د ترهګرو ډلو د احتمالي حضور او د طالبانو له خوا د رامنځته شویو ګواښونو په اړه په خبرو کې کابل ټینګار کوي چی دا هېواد اوس خوندي دی او هېڅ ډلې ته به اجازه ورنه‌کړي چې د افغانستان خاوره د نورو هېوادونو پر ضد وکاروي. دا په داسې حال کې ده، چې له تېرو درېيو کلونو راهيسې په نړيوالو او سيمه ييزو غونډو کې د افغانستان د امنيتي وضعيت په اړه تل اندېښنه ښودل شوې ده. د طالبانو د حکومت د رسمیت پيژندلو نشتوالي د دې لامل شوی چې نړیواله ټولنه د باثباته اړیکو او لویو او اوږدمهاله پانګونو په جوړولو کې کمه لېوالتیا ولري او دا داسې وضعیت دی چې د خلکو په ژوند اغیزه کوي او د فقر او بیکارۍ ګراف لوړوي. د طالبانو د واکمنۍ څه باندې درې کاله وروسته لا هم د دې ډلې چارواکي د پخواني جمهوري ریاست په پاسپورټونو تګ راتګ کوي او الکترونیکي پیسې او تذکرې لا هم د هماغه حکومت له ادرس څخه چاپ او تولیدیږي. خو د ډېرو هېوادوالو لپاره دا سوال دی چې آیا د طالبانو د حکومت په رسمیت پېژندلو مسله به په نږدې راتلونکي کې حل شي او که دا وضعیت به څو کاله دوام وکړي؟