د ۱۳۹۸ کال د جدي په دیارلسمه نیټه مشهور او ویاړلی جنرال قاسم سلیماني له شهید ابو مهدي المهندس (د عراق د ولسي پاڅون ځواکونو مرستیال) سره یو ځای بغداد هوايي ډګر ته نژدې د امریکايي اشغالګرو ځواکونو په ډرون برید کې شهید شو. جنرال قاسم سلیماني نه یوازې د ایرانیانو ملي اتل او د اته کلنې تپل شوې جګړې په اوږدو کې د دې خاورې او اوبو مدافع و؛ بلکې هغه د اسلامي نړۍ اتل او په ټوله اسلامي جغرافیه کې د ټولو مظلومو او بې دفاع مسلمانانو مدافع و. همدارنګه یې د امریکا، اسرائیلو او د غربي استعماري نړۍ د یرغل او تیري او استکباري مداخلو په مقابل کې د اسلامي امت او مسلمانو هیوادونو په میړانه دفاع وکړه او د داعش، القاعدې، تحرير الشام او طالبانو د تکفيريانو په مقابل کې د اسلامي ملت دفاعي ډال ګڼل کېده. په داسې حال کې چې د اسلامي نړۍ د مقاومت د دغه ستر معتقد، او په اسلامي نړۍ کې ولاړ د شهادت د کلیزې د نمانځلو په مناسبت په دې لنډه لیکنه کې د اسلام او مسلمانانو په دفاع کې د دغه ستر مجاهد د سرښندنو په اړه خبرې کوو:
1) د القاعدې او طالبانو په وړاندې د افغانستان د خلکو دفاع او ملاتړ:
د زړونو سردار شهید حاج قاسم سلیماني په ۱۳۷۶ کال کې د قدس ځواک (د اسلامي انقلابي ګارډ قول اردو نړیواله یا بهرنۍ څانګه) د ستر رهبر له خوا وټاکل شو. تر هغه وړاندې سردار احمد وحیدي (وروسته د دفاع او کورنیو چارو وزیر) د قدس ځواکونو لومړی قومندان و. په هغه وخت کې چې جنرال شهید سلیماني د قدس ځواک مشري په غاړه واخیسته (۱۳۷۶ کال) د طالبانو راڅرګندې شوې ډلې د القاعده شبکې په پراخې همکارۍ سره د افغانستان لویه برخه (هرات، کندهار، کابل، جلال اباد او نور) تر خپل واک لاندې کړه. د طالبانو ضد ځواکونو (پخواني مجاهدین او ځواکونه چې د مرحوم رباني په مشرۍ د افغانستان د رسمي حکومت سره تړاو درلود) د هیواد په شمال، بامیان او پنجشیر کې د طالبانو او القاعدې په وړاندې جګړې او مقاومت ته دوام ورکړ. په داسې یو حالت کې د سختو ورځو سړی سردار سلیماني د قدس ځواک قومانده په غاړه واخیسته. هغه په ټول توان سره یې د مجاهدینو او طالبانو ضد ځواکونو ملاتړ وکړ. هغه د طالبانو ضد مقاومت د ځواکونو د تجهیز او سمبالولو تر څنګ څو ځله افغانستان ته سفرونه وکړل او د مقاومت د ځواکونو په لیکو کې یې د همغږۍ او ایتلافونو د رامنځته کولو ترڅنګ په حقیقت کې د طالبانو او القاعدې پر ضد د جګړې په ډګرونو کې برخه واخیسته. اوس د پنجشېر دره ته د هغه د سفر او له احمد شاه مسعود سره د ملاقات ویډیو په مجازی نړۍ (انتړنټ) کې شتون لری.
2) د داعش له کنټرول او نیواک څخه د عراق ژغورل:
د داعش د فوځ له ناڅاپي او طوفاني بریدونو او د عراق د شمالي او مرکزي ښارونو د چټک فتحه او د بغداد په دروازو کښې د تکفیریانو له راتګ سره سره په دغه هیواد کښې د امریکې د نیواکګرو فوځیانو له شتون سره سره، چې دښمنان ګڼل کیده، د ایراني ځواکونو جنرال سلیماني (د طوفان او کړکېچ سړی) سمدلاسه عراق ته لاړ. لومړی، هغه اربیل (د کردستان د خودمختاره سیمې پلازمینه) ته لاړ او د خلکو د ځواکونو په راټولولو سره یې د داعش په لاس کې د ښار د سقوط مخه ونیوله. همدارنګه یې د عراق په نورو برخو کې هم د داعش د پرمختګ پر وړاندې موقتي دفاعي خنډونه جوړ کړل. بیا هغه د شیعه ګانو له ستر عالم آیت الله سیستاني سره لیدو ته لاړ. ښايي دا غونډه د هغه ستر عالم له خوا د داعش پر وړاندې د جهاد د فرضيت په فتوا کې له اغېز پرته نه وې. د داعش د ناڅاپه پرمختګ له درولو وروسته، چې یو بیړنی او لنډمهاله اقدام ګڼل کیده، شهید سلیماني یو اوږد مهاله پلان طرح او تطبیق کړ، چې له لاسه وتلې سیمې او ښارونه بیرته ونیسي او په عراق کې د داعش مخه ونیسي. دا ستراتیژیک او اوږدمهاله پلان د عراقي ځوانانو یو مشهور، باوري او هڅونکي ځواک رامینځته کول وو چې د حشد الشعبي یا مشهور خوځښت په نوم یادیږي. د حشد الشعبي د ځواکونو په روزنه او تنظیم سره د عراق نیول شوي ښارونه یو په بل پسې د داعش له نیواک څخه وایستل شو او د دغه هیواد د مذهبي او انقلابي ځوانانو له خوا د عراق امنیت تامین شو.
3) له تکفیری ډلو څخه د سوریې ژغورل:
په ورته وخت په عراق کښې د تکفیری ترهګرو ډلو له پراخیدو سره په سوریې کښې د دغو شیطانی ځواکونو یوه بله برخه هم د خلکو په وژلو او د ښارونو په ورانولو بوخته وه. له بده مرغه دغه ترهګرې او تکفیر ډلې د ځینو اسلامي هیوادونو (ترکیې، قطر، سعودي عربستان، متحده عربي اماراتو او داسې نورو) له خوا مالي او وسله وال ملاتړ کېدل. دوی د سوریې د ډېرو ښارونو او سیمو له فتح کولو یا ناامنه کولو وروسته د دمشق دروازو ته هم رسېدلي وو. دلته هم جنرال سلیماني او قدس ځواک د (افغان فاطمیون، پاکستانی زینبیون او عراقي حیدریون) د دفاع لپاره جنګیالي تنظیم کړل او همدارنګه د خلکو د دفاع ځواک (چې د سوري ځوانانو څخه جوړ وو) د سوریې د پوځ او د لبنان د حزب الله جنګیالیو په مرسته د سوریې ښارونه یو په بل پسې له تکفیریانو پاک کړل او په عملي توګه يې سوريه د تروريزم او تکفير په جال کې له لوېدو وژغورله.
4) د فلسطین، لبنان او یمن له مقاومت څخه پرېکنده ملاتړ:
شهید سلیماني د فلسطین د مقاومت ډلې (حماس او اسلامي جهاد) په پرمختللو وسلو سمبال کړ او د صهيونېسټ رژيم د هوايي بریدونو د مقابلې لپاره د ځمکې لاندې تونلونو جوړول د شهيد سليماني او عماد مغنيه (د حزب الله د لوړ رتبه قوماندان) له پلانونو څخه وو. د زړونو سردار او قومندان په خپل ټول ژوند او دنیا سره د منځني ختیځ د زبر ځواک (د لبنان مقاومت) ملاتړ وکړ او په لبنان باندې د صهیونیسټانو د حملې په ۳۳ ورځنۍ جګړه کښې د حزب الله د ځواکونو په کمانډو کښې حضور درلود او د جنګ په ډګر کښې یې د جنګیالیو مدیریت او قومانده کوله. سردار سلیماني د امریکا او لویدیځ په لارښوونه د سعودي عربستان او متحده عربي اماراتو د اته کلنو بریدونو او بمباریو په وړاندې د یمن د مظلومو او بې پښو خلکو او د انصار الله له انقلابي غورځنګ څخه په کلکه ملاتړ وکړ او په دې خاوره کې یې د مقاومت بیرغ پورته کړ. د هغه څه پر بنسټ چې په دې مقاله کې په لنډه توګه یادونه وشوه، شهید سلیماني د امریکا، اسرائیلو او د غربي مغرورې نړۍ د تیري او تسلط پر وړاندې د اسلامي امت او ټولو مسلمانانو د عزت او ناموس ساتونکی ګڼل کیده؛ که په سني فلسطین کې وو، یا شیعه عراق او لبنان کې، یا زیدی یمن کې، یا څو فرقه لرونکي افغانستان او سوریه کې. بې له شکه هغه د اسلامي نړۍ نه بدلېدونکې اتل او د مسلمانانو په منځ کې د حیدر ذوالفقار و، چې هر برید یې د ثقلین له عبادت څخه غوره وو. خداي دي جنتونه په نصیب کړي او روح دي یې ښاد وي!
