د بهرنیو مرستو د لګولو د څرنګوالي په اړه اندیښنې؛ طالبان باید حساب کتاب وکړي

فارین پالیسي رسنۍ د سرچینو په حواله راپور ورکوي چې د بشري مرستو ډیری پیسې هیڅکله هغو کسانو ته نه رسیږي چې ورته اړتیا لري. فارین پالیسي لیکي په داسې حال کې چې له ښځو او نجونو سره د طالبانو له سپکاوي ډک چلند د نړۍ د خبرونو په سر کې دی. دا ډله ممکن په ملیونونو ډالرو مرستې ناوړه ګټه پورته کړي او پټ کړي چې هدف یې د ناوړه انساني کړاوونو کمول دي. دغه رسنۍ په دوام کې وايي چې نغدې پیسې په مرکزي بانک کې چې د طالبانو تر واک لاندې دي او د افغانستان په نړیوال خصوصي بانک کې چې د ملګرو ملتونو ادارې حسابونه لري، ساتل کېږي. خو د دې پوښتنې ځواب نشته چې دا پیسې به په پای کې چیرته ځي. که څه هم د فارن پالیسي رسنۍ راپور کره اسناد او شواهد نه لري، خو په دغه راپور کې ځینې داسې ټکي هم شته چې له حقیقته ډېر لرې نه دي او د طالبانو د تېرو څو مياشتو د کړنو له مخې دې نتيجې ته رسېږو چې هغه پيسې چې د نړيوالو موسسو او بهرنيو هېوادونو له لارې د افغانستان له خلکو سره د مرستو په بڼه کابل ته ننوځي هغسې نه کارول کېږي لکه څنګه چې بايد په خپل اصل کې وکارول شي. د دې ادعا ثبوت د افغانانو مخ پر زياتېدونکې بې وزلي او اقتصادي ستونزې دي، چې د ميليونونو ډالرو په لګولو سره هم په دې برخه کې هېڅ بدلون نه دى راغلى او نه هم کوم پرمختګ شوى دى. خو هغه څه چې اندېښنې زياتوي دا دي چې طالبان د دغو پيسو د لګولو د لارو چارو په اړه هيڅ ځواب نه ورکوي او اساسا يې د رسنيو پر وړاندې د هر ډول غوښتنو او پوښتنو لاره تړلې ده. طالبان د یوه پیچلي امنیتي سیسټم په بڼه د خپل حکومت بنسټونه له رسنیو څخه لرې ساتي او له دې امله چې دوی هیڅکله هم د یوه جامع حکومت د جوړولو هڅه نه ده کړې او په دې برخه کې کوم جدي اقدام نه کوي، له همدې امله، دوی د ارتباطي شبکو د جوړولو او د خپلو داخلي متحدینو د پیاوړي کولو په لټه کې دي او اراده لري چې په افغانستان کې خپل حکومت ته دوام ورکړي. په بل عبارت، دا ویلای شو چې طالبان په اوسني حالت کې د خپلو ګټو لپاره د خلکو له بې وزلۍ او اقتصادي ستونزو څخه په سیاسي ګټه اخیستنه بوخت دي او د بهرنیو نغدي مرستو په ټاکلي لګښت سره غواړي له یوې خوا خپل پلویان او ملاتړي پیاوړي کړي او له بلې خوا یې مخالفې ډلې تر اقتصادي او سیاسي فشار لاندې راولي، چې بیا به هم له دوی سره مخامخ نه شي. اوس یوازینۍ لار دا ښکاري چې طالبان به په دې اړه واضح او قانع کوونکی توضیحات وړاندې کړي چې په تېرو اونیو او میاشتو کې کابل ته د ننوتلو پیسې څنګه مصرف کړي او دا چې ولې دا مرستې د خلکو پر ژوند اغېز نه کوي او د دوی ستونزې نه حلوي، په ډاګه کړي، کنه د دې ډلې په اړه پورته ګومانونه به حقیقت ته نږدې شي.