د ازبیکستان د بهرنیو چارو وزارت ویلي دي چې تاشکند به ډېر ژر د افغانستان په هکله د یوې نړۍوالې غونډې چې د څه باندې ۲۰ هېوادونو او نړۍوالو بنسټونو استازي به په کې حضور ولري کوربه وي.
د ازبیکستان د بهرنیو چارو وزارت په يوې خبرپاڼه کې ویلي چې دغه غونډه به د جولای میاشتې په ۲۵ او ۲۶ جوړه شي.
په دې غونډه کې به د سیمه ییزو، اقتصادي او سوداګریزو مسایلو په تړاو خبرې وشي.
په دغې خبرپاڼه کې راغلي دي:«د دې غونډې اصلي موخه دا ده، چې له جګړې وروسته د افغانستان ټیکاو، امنیت، بیارغونې او له سیمه ییزو همکاریو سره د هغه د یوځای کولو لپاره چې د افغانستان د خلکو او ټولې نړۍ په ګټه وي، نړۍوالې ټولنې ته تګلار وټاکي.»
د دغې خبرپاڼې له مخې، په دې غونډه کې به د څه باندې شلو هېوادونو او نړۍوالو مرستندویانو استازي ګډون ولري.
د سیاسي چارو شنونکی ولي فروزان وايي:«د خپله ازبیکستان په وینا، له افغانستانه د نړۍ پاملرنه لرې شوې ده او نړۍ مسوولیت لري چې د افغانستان په تړاو د اقتصاد او د افغانستان د نظام په هکله یو مهم رول ولوبوي، چې افغانستان څنډې ته نه شي او اقتصادي او سیاسي سیسټم یې په بشپړه توګه ونه پاشل شي.»
د اقتصادي چارو شنونکي نازکمیر زیارمل هم وویل:«په اقتصادي برخه، افغانستان ته د بشرپاله مرستو، د افغانستان ټرانزیټي مسایلو او له افغانستان سره د ازیبکستان د نیمګړو پروژو په ځانګړې توګه له ازبیکستانه تر کابله او له کابله تر پېښوره د رېل پټلۍ مسایل به د دغې غونډې په اجنډا کې وي او بحث به پرې وشي.»
بل خوا کابل وایي چې ټاکل شوې ده، د ازبیکستان په رسمي بلنه د بهرنیو چارو وزارت د سرپرست امیرخان متقي په مشرۍ یو پلاوی چې د ځينو نورو وزارتونو استازي به هم په کې شامل وي، په دې غونډه ې ګډون وکړي.
د اسلامي امارت د ویاند مرستیال بلال کریمي څرګنده کړه:«د ازبیکستان په رسمي بلنه، د امیرخان مقتي په مشرۍ د دغه پلاوي په تشکیل کې د وزارتونو او سکټوري بنسټونو غړي به هم حضور ولري او اسلامي امارت خپله داعیه او د هېواد اړتیاوې به څرګندې کړي او د دغې غونډې په څنډه کې به له بېلابېلو لوریو سره بحث او خبرې وکړي.»
تر دې مخکې هم د افغانستان په تړاو څو غونډې جوړې شوې دي، خو تراوسه هېڅ هېواد سرپرست حکومت په رسمیت نه دی پېژندلی.
