معاون رئیس الوزرای طالبان می‌گوید که «کشورهای همسایه باید از بدرفتاری با مهاجران افغان خودداری کنند.»
به گزارش خبرگزاری معمار، مولوی عبدالکبیر، معاون سیاسی ریاست‌الوزرای طالبان در دیدار با عبدالجبار تخاری، سرقونسل افغانستان در شهر کراچی پاکستان گفته است که «کشورهای همسایه باید از بدرفتاری با مهاجران افغان خودداری کنند.»
به نقل از منابع رسانه‌ای طالبان، عبدالجباری تخاری در این دیدار در پیوند به مشکلات و وضعیت مهاجران افغان مقیم پاکستان به معاون سیاسی ریاست‌الوزرای این گروه معلومات ارائه کرده است.
تخاری افزوده که «ده‌ها تن از مهاجران افغان از زندان‌های پاکستان آزاد شده‌اند و درباره تعداد زیادی دیگری از آن‌ها نیز بحث‌ها در جریان است.»
مولوی عبدالکبیر هم در این دیدار گفته که «کشورهای همسایه باید از بدرفتاری با مهاجران افغان خودداری کنند و برای آنان سهولت‌های لازم را فراهم کنند.»
وی همچنان افزوده که کشورها و سازمان‌های بین‌المللی باید به کمک‌های خود با مهاجران افغان ادامه دهند.
گفتنی است حکومت پاکستان از یک سال بدین‌سو روند بازداشت و اخراج مهاجران افغانستانی را به گونه کم‌سابقه افزایش داده است.