وزارت دفاع روسیه اعلام داشت که نیروهای این کشور و تاجیکستان، برای تمرین مبارزه با باندهای مسلح غیرقانونی و حفاظت از سرحدات، تمرینات مشترک نظامی را در خاک تاجیکستان آغاز کردند.
رسانه های تاجیکستان هدف از برگزاری این مانور نظامی مشترک را مقابله با افزایش تهدیدات تروریستی و هرگونه تهدید احتمالی عنوان کردند.
بر پایه اخبار منتشر شده برخی تجهیزات نظامی روسیه برای این مانور به پایگاه نظامی 201 تاجیکستان منتقل شده است و انواع تاکتیک‌های رزمی به ویژه تاکتیک مهار گروه‌های تروریستی که به صورت غیرقانونی وارد تاجیکستان می‌شوند را در این رزمایش تمرین می‌کنند.
پیش از این در فروردین ماه سال گذشته نیز نیروهای مسلح روسیه و تاجیکستان رزمایش مشترکی را در مرز با افغانستان برگزار کرده بودند.
پایگاه نظامی 201 در شهرهای دوشنبه و باختر تاجیکستان واقع شده است که بزرگترین مرکز نظامی روسیه در خارج از مرزهای این کشور گفته می‌شود.
تاکنون هیئت حاکمه افغانستان به این رزمایش مشترک که در نزدیکی افغانستان برگزار می‌شود واکنشی نشان نداده است، اما مقامات حکومت طالبان بارها تأکید کرده‌اند که هیچ تهدیدی از خاک افغانستان متوجه دیگر کشورها و به خصوص همسایگان افغانستان نمی‌شود.
