سراج‌الدین مهر‌الدین، وزیر خارجه تاجیکستان اعلام کرده است که سازمان پیمان امنیت جمعی طرح تقویت امنیتی مرز این کشور و افغانستان را در سال جاری میلادی تصویب می‌کند.
سراج‌الدین مهر‌الدین گفت: «می‌توانیم به طور جمعی اقداماتی برای تقویت مرز تاجیکستان و افغانستان انجام دهیم.»
به نقل از خبرگزاری تاس، وزیر خارجه تاجیکستان درباره جزئیات این طرح توضیحی نداده، اما گفته است: «ابتکار امامعلی رحمان، رئیس‌جمهور تاجیکستان برای ایجاد کمربند امنیتی در اطراف افغانستان، که از سوی وی در تریبون‌های بین‌المللی مطرح شده است، نه تنها برای ایجاد استحکامات در مرزها، بلکه برای ایجاد شرایط در هر دو طرف فراهم می‌شود.»
این در حالی است که امامعلی رحمان؛ رییس جمهور تاجیکستان ایده ایجاد کمربند امنیتی در اطراف افغانستان را در ماه میزان سال ۱۴۰۱ در نشست فوق‌العاده سازمان پیمان امنیت جمعی مطرح کرد.
آقای رحمان در آن زمان هشدار داد که افزایش فعالیت گروه‌های تروریستی بین‌المللی در افغانستان به طور مستقیم بر امنیت کشورهای عضو سازمان پیمان امنیت جمعی تأثیر می‌گذارد.
در همین حال، نیکلای پاتروشف؛ دبیر شورای امنیت ملی روسیه و صدر جباروف؛ رییس جمهور قرقیزستان دو روز پیش در نشستی در بیشکک اعلام کردند که ۲۰ گروه تروریستی بین‌المللی در افغانستان همچنان فعال‌اند
